Бүлүү бөлөх улуустарынан сырыы кэннэ…

Ыраахтан-чугастан сылдьар ыалдьыттары-айанньыттары аһатарга сананан тэрилтэ салайааччылара ЧАЙНОЙ-дары тутарга син ботуччу үбү уган үлэлэтэллэрэ, дьиҥинэн хайҕаллаах суол.

Ол эрээри, тоҕо ЧЭПЧЭ-лэрин (туалет) ыраастык тутуу кинилэргэ отойдуун кыаллыбатый?

Сылайан-элэйэн уһун айаны тулуйан көҕүрэттэ киирдэххэ кумаахы өрөһөлөнөн, иһинэн-таһынан тоҥмут ииги-сааҕы көрөн киһи чэпчиэн санаата ханнан хаалар.

Бу маннык хартыына республикабыт хайа баҕарар муннугар баар көстүү.

Аны туран, барыта олохтоох саха урбаанньыттарын КАФЕ-лара ээ.

Кир-хох быыһыгар хайдах дьаһанан олорорбутун илэ харахтарынан көрөр буоланнар туора, кэлии омуктарга баһыйтарабыт-сэнэттэрэбит буолаарай?

Бып-быытыкаай кумаахы сыыһын хайаҕаска-дьөлөҕөскө сатаан булларбат-бырахпат эрээри, “балыырдаах балыытыканы” биэс тарбах билэр курдук ырытан-мөҥүттэн дьиэ иһин (ауратын) киртитэри ордорооччулар ахсааннара көҕүрүүрэ көстүбэт.

Ол кэриэтин, туохха барытыгар буруйдааҕы булан, ОЛОХ-пут букатын куһаҕан диэн халтай куолулааччы элбээн иһэр.

Бэйэ тэлгэһэтин иһин кыайан дьаһаммат эрээрибит ОМУК быһыытынан хайдах салҕыы сайдабыт?

Үтүө холобур буолар оннугар  оҕолорбутугар туох-ханнык ИИТИИ-ни биэрэбитий?

Онтон, тустаах хонтуруоллуур уорганнар, улуустааҕы, республикатааҕы РосПотребНадзор тугу көрөрүй?

Хамсык, тумуу… ыарыы утары төһө киһи быһыы ылбытын бэрибиэркэлээн хамнас ылаллар дуу?

Аҕыйах хаалбыт САХА-лар, кэлэр кэскилбит олоҕо тупсарын туһугар, хас биирдиибит кыраттан саҕалаан, арыый даҕаны бэрээдэги — сатаатар ЧЭПЧЭ-бит ыраас буоларын көрүнэр күммүт тиийэн-тирээн кэлбитэ буолаарай.

ХАРЧЫ-ннан хармааны эрэ хаҥатар ньыманнан туһанар төһө сөптөөҕүн Дьылҕа Хаан ыйааҕа биллэриэ-быһаарыа турдаҕа…

Алексей Павлов: Сундуук кистэлэҥэ