Cырдык санааны саҕар сэргэх көрсүһүү

Алтынньы 20 күнүгэр суруйааччы, СӨ үөрэҕириитин уонна СӨ култууратын туйгуна Василий Гоголев-Уйулҕаны кытта истиҥ сэһэргэһиилээх, сырдык санааны саҕар сэргэх автограф-сиэссийэ буолан ааста.

Балаҕан ыйын бүтүүтэ Уйулҕан «Хамначчыт кыыс дьылҕата» диэн ураты суолталаах сэһэнэ бэчээттэнэн кэлэн, атыыга тахсан күн сирин көрбүтэ. Бу сэһэн — Василий Иннокентьевич күн күбэй ийэтин Екатерина Васильевна уустук олоҕун, ыарахан дьылҕатын сырдатар айымньы. Уйулҕан, псевдонима да этэрин курдук, маннык сюжетынан ааҕааччы уйулҕатын хамсатар, долгутар, сэһэни киһи биир тыынынан ааҕар.

Көрсүһүүнү кинигэни бэлэмнээн таһаарбыт «Айар» кыһа генеральнай дириэктэрэ Август Егоров саҕалаата. СӨ норуодунай суруйааччыта, бэйиэт уонна прозаик, тэлэбиидэнньэ суруналыыһа Наталья Михалева-Сайа, СӨ Суруйааччыларын, РФ Суруналыыстарын сойуустарын чилиэнэ, бэйиэт, прозаик, “Күрүлгэн” сурунаал сүрүннүүр эрэдээктэрэ Афанасий Гуринов-Арчылан, Арассыыйа уонна Саха АССР үтүөлээх артыыһа, алгысчыт Дмитрий Артемьев, ону тэҥэ биир дойдулаахтара, доҕотторо-атастара, айар үлэтин сэҥээрээччилэр кэлэн ыалдьыттаан, тыл этэн, ыйытыы биэрэн, санаа атастаһан, баҕа санааларын, эҕэрдэ тылларын тиэрдэн тэрээһини киэргэттилэр. Түмүккэ кинигэҕэ ааптарга илии баттатыы буолла.