«Дьылҕа оҥоһуута» арамаан тула

Алтынньы 22 күнүгэр суруйааччы Гаврил Адамов-Сайдамныын истиҥ көрсүһүү буолан ааста.

Бу көрсүһүүгэ кини саҥа, дьоһун айымньытын — «Дьылҕа оҥоһуута» арамаанын тула иһирэх кэпсэтии, кинигэни кытта билсиһии, санаа үллэстиитэ буолла. Кэлбит дьон арамаан ис хоһоонун дириҥник ырытан, элбэх ыйытыылары биэрдилэр. Маны тэҥэ кинигэ ис хоһоонунан уонна суруйааччы тус олоҕуттан кылгас викторина ыытылынна, сөпкө хоруйдаабыт дьон бэлэх туттулар!

Бу үөрүүлээх түгэҥҥэ «Айар» кыһа генеральнай дириэктэрин солбуйааччы, кинигэ эрэдээктэрэ Валерий Лукавцев истиҥ тыллары этэн, кыһа аатыттан махтал сурук уонна сэмэй бэлэх туттарда. Ону сэргэ «Көмүөл» кыһа салайааччыта, суруйааччы, сценарист Борис Павлов кэлэн тыл эттэ, өйөбүлүн биллэрдэ. Суруйааччы биир дойдулаахтара, бииргэ үөрэммит доҕотторо-атастара сылаас тылларын, үтүө санааларын эттилэр, эҕэрдэлээтилэр, айар үлэтигэр ситиһиилэри баҕардылар!

«Дьылҕа оҥоһуута» кинигэни https://ayar.ru/ интернет-маҕаһыынтан уонна «Айар» бары маҕаһыыннарыттан атыылаһыахха сөп. Ромаҥҥа 50–60-с сыллардааҕы тыа ыччатын олоҕо ойууланар. Огдообо ийэ бэйэтин олоҕун оҥосто сатаан, эбэлээх эһэтигэр иитил либит уол судургута суох дьылҕата көстөр. Олус үлэһит, талааннаах, ыччат лидерэ уол ыарахан ыарыыга ылларан олоҕо тосту уларыйар. Таптыыр, олоххо талаһар бырааптаах дуо, аны? Кинини киһи диир кыыс, ама, баар дуо? Биитэр ол аһынар эрэ санаа дуу?.. Эдэр оҕо муунтуйуута, ырааҕы-чугаһы ырыҥалаан көрүүтэ, олоххо сыһыанын уларыйыыта, туһалаах буоларга, дьолго тиксэргэ дьүккүөрэ — бу барыта ааҕааччыны уйадытар, дириҥ толкуйга киллэрэр уонна угуйар. Ромаҥҥа Чурапчы улууһун биир кыра нэһилиэгэр олорон ааспыт, бар дьонугар номох буолан хаалбыт киһи, киниэхэ эрэллээх доҕоро, кэргэнэ, ыраас ыра санаа аанньала буолбут кыыс дьылҕалара кэпсэнэр. Кини олоҕо, иэйиитэ, санаатын күүһэ ханнык баҕарар ааҕааччыга, ордук ыччакка, үтүө холобур буолаарай диэн уус-уран сурукка тиһиллибит.