II өрөспүүбүлүкэтээҕи муус оҥоһук күрэһэ саҕаланна

❄️Хадаайы кырдалыгар муус эрбиир тыас куугунаан олорор. Ыраахтан-чугастан айаннаан кэлбит ыалдьыттарга алгыс сиэрин-туомун Варвара Алексеевна Парфенова оҥордо. Түмэл салайааччыта Владимир Таппыров күрэхтэһээччилэргэ ситиһиилээх үлэни уонна сылын аайы кэлэн Таатта дьонугар муус оҥоһуктары оҥорон кэрэҕэ уһуйалларын иһин махтал тылларын анаата.
Үлэни өрө туппут айар-тутар дьоҕурдаах эр дьоммутугар Дьулустаан Толстяков ырыатын бэлэхтээтэ.
Күрэххэ былырыын кыттыбыт улууспут маастардара Василий Назаров, Василий Попов, Алквиад Атастыров, Афанасий Варфоломеев, Мэҥэ Хаҥаластан Дьулустаан Марков, Үөһээ Бүлүүттэн Леонид Афанасьев, Сунтаартан эдэр маастар Максим Охлопков, Уолбаттан Иван Боппосов уонна Семен Рахлеев эрдэттэн бэлэмнэнэн кэлбит эскизтэринэн баараҕай муустарга үлэлэрин саҕалаатылар.
Тымныыттан толлубат, хараҥаттан самныбат тулуурдаах маастардарбыт ситиһиилэри баҕарыаҕын.