Талбан талба оонньуулара

Биллэр суруналыыс, шоумен Олег Колесов — Талбан Инстаграм сирэйигэр сэргэх сонунун кэпсээтэ: «Киһи бэйэтэ айан таһаарара, тугу ыра санаа гынан иитиэхтии сылдьыбытын олоххо киллэрдэҕинэ ордук астынар, кынаттанар. #ТОК диэн бэйэм айбыт биэриибин алта сыл устата оҕолуу бүөбэйдээн, араас дьону ыҥыран, элбэх ыйытыыны, сорудаҕы толкуйдаан үлэ бөҕөнү көрсүбүтүм.

Ол үлэм биэрии буолан билигин архыыпка хараллар. Онтон тыһыынчанан ыйытыылар таах сытыахтара дуо диэн санааттан, ону тэҥэ хас тыл күнэ буоллаҕын ахсын сценарийбын көрдүүр киһи элбэҕиттэн да буолуо, остуол оонньуутун оҥордум. Бу курдук үгүс сырабын ылбыт үлэм үйэтитиллэн хаалбытыттан астынным. Былырыын бастакытын холонон таһаарбытым, быйыл саҥалыы тыыыннаатым, тупсардым».