Тар уонна ый халандаарын кистэлэҥнэрэ арылыннылар!

«Айар» маҕаһыыныгар биологическай наука кандидата, этноботаник, айымньылаах ааптарбыт Варвара Васильевна Семеновалыын истиҥ көрсүһүү буолан ааста.

Көрсүһүү сүрүн тиэмэтинэн саха төрүт аһа – тар тула буолла. Варвара Васильевна истээччилэргэ тар туһунан, суолтатын уонна култуураҕа уратытын сиһилии сырдатта. Уонна доруобуйаҕа дьайыытын, кини туһалаах хаачыстыбаларын туһунан дириҥ ырытыылары оҥордо. Тар аныгылыы астанар ньымаларын сырдатан, сайыҥҥы уонна күһүҥҥү тары хайдах оҥорорго, астааһын кистэлэҥнэрин туһунан туһалаах сүбэлэри биэрдэ. Мустубут истээччилэрбит үксэ тары бэйэлэрэ астыылларын сөҕө-махтайа иһиттибит!

Көрсүһүү иккис тиэмэтинэн оҕуруотчуттарга анаммыт Ый халандаара буолла. Варвара Васильевна кэлэр 2026 сылга оҕуруот үлэтин хайдах былаанныырга, ый туругуттан көрөн үүнээйини хаһан олордорго, хаппыыстаны тууһуур кэмнэрин, оннооҕор үүнээйини хаһан ыһар, хаһан хомуйар кистэлэҥнэрин сиһилии кэпсээтэ. Бу сүбэлэр кэлэр сайын оҕуруот үлэһиттэригэр улаханнык көмөлөһүөхтэрэ.

Тэрээһин бүтүүтүгэр автограф-сессия уонна аһаҕас кэпсэтии ыытылынна. Баҕалаахтар Варвара Васильевна кинигэлэрин атыылаһан илии баттаттылар, ааптары кытта чугастык кэпсэтэн, бэйэлэрин ыйытыыларыгар быһаччы хоруйдары ыллылар.