Ыллыктаах туруорсуу өйөнөн оһуохайдьыттар бары махтаннылар

Үс Хатыҥҥа «Кыайыы оһуохайа» түмүктэннэ

Бэс ыйын 28-29 күннэригэр Үс Хатыҥ алгыстаах түһүлгэтигэр өрөспүүбүлүкэтээҕи Кыайыы Оһуохайа икки күн устата тэрээһиннээхтик ыытылынна.

Быйылгы күрэх Кыайыы 80 сылыгар уонна САССР искусствотын үтүөлээх диэйэтэлэ, Аар тайҕа ырыаһыта, оһуокайдьыт С.А.Зверев-Кыыл Уола төрөөбүтэ 125 сылыгар ананан ыытылынна. Оһуокай өрөспүүбүлүкэтээҕи түмсүүтүн бэрэссэдээтэлэ А.Д.Данилов-Дьулуур Хаан баһылыктаах Тойон сүбэ үлэлээтэ. Икки күнү быһа дьүүллүүр сүбэ чилиэттэрэ ардаҕы ардах диэбэккэ этээччилэр түһүлгэлэрин таһаарыыларын, хоһуйуутун, тэтими биэрээһини, тутууну көрөн сыаналаатылар. 56 этээччи суруйтарбытыттан 51 этээччи эттэ. Бүлүү бөлөх улуустарыттан, Мэҥэ Хаҥаластан, Намтан, Тааттаттан, Амматтан, Дьокуускайтан, кэлэн кытыннылар.

Быйылгы күрэххэ аан бастаан оһуокайдьыттарбытыгар аналлаах балаҕан тутуллан силигэ ситтэ. Оһуокай түмсүүтүн салайааччыта Александр Джурович ыллыктаах туруорсуута өйөнөн, Дьокуускай куорат мээрийэтэ туттарбытыгар оһуокайдьыттар бары махтаннылар үөрдүлэр. Балаҕан иһигэр остуоллары, олорор ыскамыайкалары, араас тэриллэри булууга этээччилэр уонна Таатта, Нам түмсүүлэрэ харчынан көмөлөстүлэр. Онон таһыгар төгүрүччү сэргэбит тула олорорго ыскамыайкалар, хаххалыыр аныгы бүтэй баар буолла. Урут сыралҕан куйааска аһаҕас халлаан анныгар тоҕуоруһар буоллахпытына, билигин көмүлүөк оһохтоох балаҕаннаах буоллубут.

Халлааммыт эмиэ сыралҕан итиитинэн, ардаҕынан, иккис күммүтүгэр сытыы тыалынан да сабыта оҕустар, алгыстаах түһүлгэ киэҥник тэнийдэ. Бар дьон Дархан этээччилэрбит, норуот уоһуттан түспэт, кэпсэлгэ сылдьар оһуокайдьыттарбыт Сунтаартан Кураһаай Мэхээлэ, Мэҥэ Хаҥаластан Виталий Никифоров, Стас Иванов о.д.а. түһүлгэлэртэн астыммыт буолуохтаах. Элбэх араас омук ыһыах ыалдьыттара «Дархан этээччилэр» Виталий Никифоров, Стас Иванов, Денис Оконешников уонна «Саха сирин Үтүөлээх этээччилэр» түһүлгэлэрин ыраахтан истэн кэлэн дуоһуйа үҥкүүлэһэн күлэн үөрэн махтанан бардылар.

Финалга 15 этээччи талыллан киирэн, тууйастан кумааҕы тардан, онно түбэспит теманан тутатына хоһуйдулар. Гран При аатын Тааттаттан Саха сирин Үтүөлээх этээччитэ Афанасий Николаевич Попов ылан, 350 тыһыынча солкуобайдаах сертификатынан наҕараадаланна уонна Саха сирин Дархан этээччи үрдүк аатын сүктэ. Бастакы миэстэни Намтан Саха сирин Үтүөлээх этээччитэ Семен Петрович Алексеев ылла уонна 150 тыһыынчалаах сертификаты тутта, Иккис миэстэни Бүлүүттэн сылдьар Саха сирин Үтүөлээх этээччитэ Мэҥкэр Сэмэн Хабырыыл уола буолан 70 тыһыынчалаах сертификаты илиитигэр тутта, Үһүс миэстэ Сунтаартан сылдьар Дмитрий Кондратьев ылан 30 тыһыынчалаах сертификатынан наҕараадаланна.

Оһуокай өрөспүүбүлүкэтээҕи түмсүүтүн бэрэссэдээтэлэ А.Д.Данилов-Дьулуур Хаан, солбуйааччыта А.Л.Тарскай тэрилтэлэри кытары үлэһэн кыттыбыт этээччилэр, кынаттар сыаналаах сертификаттарынан наҕараадаланнылар. Онон Кыайыы 80 уонна улуу оһуокайдьыт Кыыл Уола- Сэргэй Сибиэрэп 125 сылыгар анаммыт Кыайыы Оһуохайын күрэҕиттэн илии тутуурдаах, өттүк харалаах бары кыттааччылар уонна кынаттар тарҕастылар.

Түгэнинэн туһанан кэнники икки сылга Таатта улууһугар Оһуокайга биллэр хамсааһын (Таатта Оһуокайын түмсүүтэ салайааччыта И.Иванов) тахсыбытын бэлиэтиир тоҕоостоох. Манна быйылгы Кылаан кыайыылаах Афанасий Николаевич Попов ыччаттары, оскуола оҕолорун кытары бииргэ түмсэн үлэлии сылдьаллар. Онон Бүлүү бөлөх, Мэҥэ Хаҥалас, Нам улуустарын оһуокайдьыттарын утумнарын туттулар.