Ытык дьоммут оһуохайдаан бардылар

Сэтинньи 2 күнүгэр СӨ Оһуохай түмсүүтүн ыҥырыытынан ытык дьоммут, Арассыыйаҕа туризмы тэрийиигэ хоннохтоохтук ылсан үлэлии сылдьар, Атласовтар уһаайбаларын хаһаайыттара, Арассыыйаҕа  биир бастыҥ биллэр шеф-повар Николай Атласов дьоно, кэргэннии Валентина Иннокентьевна, Василий Николаевич Атласовтар өрөбүллээҕи оһуохайбытыгар кэлэн бардылар.

Алгыс ыытыллар саалатыгар Валентина Иннокентьевна аал уоту оттон алгыстаата, ууруунуу суруктаах харысхал кумааҕылары хас биирдии киһиэхэ талларан биэрдэ уонна суолтатын быһаарда. Аал уоту оттон ис дууһаларыттан оһуохайга сылдьар дьоҥҥо алгыс үтүө тылларын анаата. Алгыс кэнниттэн Атласовтарга анаан  Аар Дархан этээччи Егор Михайлович Осипов, Дархан этээччи Валентин Хорунов түһүлгэлэригэр оһуохайдастылар, ырыаһыттар Ким Кузьмин, Евгения Игнатьева эҕэрдэ ырыаларын ыалдьыттарбыттарыгар анаатылар.

Горнайтан учуутал Любовь Дмитриева анаан-минээн киирэн кытынна, оһуохайга түһүлгэлээн сүрэхтэннэ. Александр Джурович аатыттан махтал суруктары, Оһуохай хартыынатын бэлэх туттардыбыт.
Василий Николаевич Оһуохай аан маҥнай Үс Хатыҥ түһүлгэтигэр анал миэстэтэ суоҕар, бэйэтин түһүлгэтин Оһуохайга уларса сылдьыбытын кэпсээтэ. Оһуохай маҥнай тэриллэригэр өҥөлөөх этим диэтэ. Ытык дьоммут Атласовтар Арчыга, Оһуохайга анаан-минээн кэлбиттэригэр ис сүрэхтэн махтанныбыт. Күндү дьоммут этэҥҥэ эрэ буолуҥ!