Ытыктанар баһылык, сатабыллаах салайааччы, дэгиттэр спортсмен

“САҔАЛАММЫТЫ ТИҺЭҔЭР ТИЭРДИИ” диэн Ытык Таатта кырдьаҕас Чөркөөҕүн баһылыга Андрей Петрович Семенов үлэтин сүрүн суолтата этэ…

АНДРЕЙ ПЕТРОВИЧ СЕМЕНОВ 1968 сыллаахха от ыйын 17 күнүгэр Бүлүү улууһун Тоҕус нэһилиэгэр күн сирин 2 оҕонон көрбүтэ.

1985 с. Орто Халыма орто оскуолатын бүтэрбитэ. Оскуола кэнниттэн тутатына Өлүөхүмэтээҕи механизация уонна электрофикация техникумугар үөрэнэ киирбитэ.

1986-88 сылларга Сэбиэскэй Аармыйа кэккэтигэр сулууспалаан баран,  Орто Халымаҕа оройуоннааҕы тутуу управлениетыгар үлэлээбитэ. Ити сыл  1-кы нүөмэрдээх профтехучилищеҕа  суоппар үөрэҕэр үөрэммитэ.

Ол кэнниттэн Орто Халымаҕа, Дьокуускайга  араас үлэҕэ, эргиэн эйгэтигэр, куттал суох буолуутун сулууспатыгар, самолетунан көтөр авиаэтэрээткэ 2-с кылаастаах ытааччынан үлэлээбитэ.

1994 сыллаахха олоҕун аргыһын Вырдылина Лилия Николаевнаны көрсөн, ыал буолбуттара уонна Чөркөөххө олохсуйбуттара.

Чөркөөххө бастакы үлэтин саҕалааһына олох-дьаһах  хаһаайыстыбатыгар хачыгаарынан, онтон Октябрьскай нэһилиэк дьаһалтатыгар спорт инструктарынан, директорынан үрдүк таһаарылаахтык үлэлээбитэ.

2009 сылтан чааһынай урбаанньыт буолан, чааһынай тэрилтэ, онтон “Талбан” аһаҕас тэрилтэ тэриммитэ.

Андрей Петрович 2019 сыллаахха балаҕан ыйыгар Октябрьскай нэһилиэк баһылыгынан талыллыбыта уонна нэһилиэк дьоно-сэргэтэ эрэнэн 2024 сыллаахха иккис болдьоххо талыллан үлэлии сылдьыбыта.

Баһылык буолаат, биир бастакынан нэһилиэк эр дьонун түмпүтэ. Ол түмүгэр бөһүөлэк ис-тас өттүгэр араас субуотунньуктар буолбуттара. Быһыт тутуута, эргэ хаарбах тутуулары көтүрүү, кыаммат ыалларга муус ылыыта, КОВИД кэмигэр мунха балыгыттан, сааскы кустан нэһилиэк дьонугар  тунэтии, суоллары өрөмүөннээһин, сааскы халаан уутугар эмсэҕэлээбит муосталары чөлүгэр түһэрии о.д.а үлэлэр ыытыллыбыттара.

Нэһилиэк дьаһалтата “Олохтоох көҕүлээһини өйүүр” (ППМИ) программаҕа сыл ахсын кыттан — ууну ыраастыыр оборудование ылыыта, КСК өрөмүөнэ, паарка трибунатын көтүрэн саҥаттан тутуу, Кыайыы скверин тутуу, Хадарҕааччы, Мындайбан уулуссаларыгар уот ситимин тардыы, оскуолаҕа барыыга сатыы сылдьар киьи муостатын тутуу, сири хорутар булууктаах уонна отваллаах гусеничнай бульдозер атыылаһыыта, сайыҥҥы уу ситимин саҥардыыга материаллары ылыы, эһиилги сылга “Чөркөөх пааркатын” ситэрэн биэрии бырайыагынан куонкурска кыттыы.

Андрей Петрович салалтатынан 2020 сыллаахха о5о спортивнай былаһаакката искусственнай газонунан тэлгэммитэ.  Ирдэниллэр бары докумуоннарын ситиһэн, экспертизаны ааһан, нэһилиэкпитигэр тутуулар саҕаламмыттара. Ол курдук, Былатыан Ойуунускай аатынан культурнай Киин; “Хаарбах дьиэттэн көһөрүү” Программанан үс этээстээх уопсай таас дьиэ; Спортивнай модульнай саала, Почта России аныгылыы дьиэтэ үлэҕэ киирбиттэрэ, итиэннэ Киин уулуссабыт өрөмүөннэннэ,  бөҕү тоҕорго площадкалар оноһуллуннулар.

Нэһилиэкпит геральдикатыгар өрөгей ырыатын уонна нэһилиэкпит Былааҕа бигэргэтии, дизайн-кодун онотторуу, араас таһымнаах тэрээһиннэри тэрийии уонна үрдүк таһымҥа ыытыы үлэлэрэ барбыттара.

Тыа хаһаайыстыбатыгар «Сайылыктарга уот ситимин киллэрии» программанан Гаврил Массаев, Тарас Жегусов хаһаайыстыбаларыгар уонна Тохтобулга уот ситимэ тардыллан үлэҕэ киирбиттэрэ, министиэристибэ ыытар граннарыгар кыттан 3  граны нэһилиэкпит бааһынай хаһаайыстыбалара ылары ситиспиттэрэ.

Дьаһалта бэйэтэ үбүлээн Улуу Кыайыыны  уһансыбыт биир дойдулаахтарбытыгар анаан стела оҥоһуллубута,  Николай Тулааһынап аатынан уулуссаҕа уот   ситимэ тардыллыбыта,  грейдер, улахан кыамталаах уу хачайдыыр насос атыылаһыллыбыта, саҥа дьыллааҕы харыйа, сынньалаҥ пааркабытыгар Аал-луук мас  о.д.а. оҥоһуллубута.

Андрей Петрович үлэлиир кэмигэр төһө да КОВИД ыарыыта хааччахтаатар, хаар уонна халаан ууларыгар бардарбыт, ойуур баһаарын утары үлэлэстэрбит, Анал байыаннай дьайыы системата да киирдэр, нэһилиэкпит хас биирдии олохтооҕо  уйгулаах, сарсынныга эрэллээх олохтоноругар үлэтин уонна олоҕун анаабыта, “Саҕаламмыттары тиһэҕэр тиэрдии”  диэн үлэтин сүрүн суолтата этэ…

Тапталлаах кэргэнигэр Лия Николаевнаҕа, оҕолоругар, чугас аймахтарыгар дириҥ кутурҕаммыын тиэрдэбит!

Ытыктанар баһылык,  сатабыллаах салайааччы, дэгиттэр спортсмен, тапталлаах кэргэн, Аҕа, Эһээ, эрэллээх доҕор СЕМЕНОВ АНДРЕЙ ПЕТРОВИҺЫ тиһэх суолугар атаарыы бу дьыл ахсынньы 6 күнүгэр Таатта улууһун Чөркөөҕөр спортивнай комплекска 10.00 чаастан ыытылларын иһитиннэрэбит.

Шок! Играли в волейбол и вдруг… скоропостижно скончался глава наслега